Los Angeles Times

Die Los Angeles Times is die vierde grootste dagblad in die Verenigde State - na USA Today, The New York Times en The Wall Street Journal - met 'n sirkulasie van 467 309 in Mei 2016^[2] en 'n beraamde daaglikse leserskap van 1,4 miljoen op werk- en 2,4 miljoen op Sondae.^[3] Sy webtuiste latimes.com het sowat 39 miljoen besoekers per maand.

Die Los Angeles Times het in die 1960's van 'n streekskoerant tot een van die wêreld se grootste dagblaaie ontwikkel.^[4] Sy verslaggewing is met altesaam 44 Pulitzer-pryse bekroon (waarvan die tot dusver laaste in 2016 vir die LA Times se nuusdekking oor die terreuraanval in San Bernardino toegeken is).^[5] Desondanks is die nuusblad se redaksiepersoneel ná die oorname deur 'n media-onderneming uit Chicago, Tribune Publishing en later Tronc, verminder van 1 300 tot sowat 400, met snel-wisselende personeel en 'n geskil rondom pensioenverpligtinge ter waarde van VSA-$90 miljoen en die stigting van 'n vakbond waarin medewerkers begin organiseer het, as tekens van agteruitgang.

In Februarie 2018 het die Los Angeles Times sy oorname deur die farmaseutiese entrepreneur en multimiljardêr Dr. Patrick Soon-Shiong vermeld. Soon-Shiong, wat as seun van Chinese immigrante in 1952 in Port Elizabeth, Suid-Afrika gebore is en hom in die 1980's in Los Angeles gevestig het, word as die Suid-Kaliforniese metropool se rykste burger beskou.^[6] Met die aanvaarding van die oorname-aanbod ter waarde van VSA-$500 miljoen, wat ook die susterblad San Diego Union-Tribune insluit, het die LA Times ná 18 jaar se onstuimige bestuur vanuit Chicago weer 'n plaaslike eienaar.

Tydens sy eerste stadsaalbyeenkoms met die nuusblad se redaksie het Dr. Soon-Shiong op 13 April 2018 aangekondig dat die Los Angeles Times se historiese hoofkwartier in 'n Art Deco-gebou in die middestad van Los Angeles nog in die somer van 2018 na 'n nuwe kampus in El Segundo verskuif sou word. In Julie 2018 het die redaksie in die nuwe kantore naby die Internasionale Lughawe van Los Angeles ingetrek.

Die ikoniese Los Angeles Times-gebou teenoor Los Angeles se raadsaal, waarin die redaksie sedert 1935 gehuisves is, is deur die vorige eienaars aan die Kanadese eiendomsontwikkelaars Onni Group verkoop. Volgens Dr. Soon-Shiong het Onni Group die maandelikse huurgeld vir die redaksie se kantore met $1 miljoen verhoog. Die LA Times se huurkontrak het op 30 Junie 2018 ten einde geloop.^[7]

1. ↑ latimes.com: Editorial Staff Directory. Besoek op 15 Januarie 2020
2. ↑ "Cision: Top 10 US Daily Newspapers. Besoek op 11 Junie 2017". Geargiveer vanaf die oorspronklike op 14 Junie 2017. Besoek op 11 Junie 2017.
3. ↑ www.latimes.com: About Us. Besoek op 11 Junie 2017
4. ↑ Encyclopædia Britannica: Los Angeles Times. Besoek op 11 Junie 2017
5. ↑ Spiegel Online, 8 Februarie 2018: Verkauf von "Los Angeles Times" - Retter mit Skalpell. Besoek op 14 April 2018
6. ↑ Spiegel Online, 8 Februarie 2018
7. ↑ Los Angeles Times, 13 April 2018: Patrick Soon-Shiong plans to move Los Angeles Times to new campus in El Segundo. Besoek op 15 April 2018